دەنگی تۆ
نوسينى/ هاوبير كامران
دەنگی تۆ وێنەی خودایە و چاوەكەت ڕۆحی مەسیح
ئەی مەسیحا دەردی ئەم قەلبە پەشێوەم چارەكە
بەژنی تۆ عەرعەر زولف چین چین دڵم فیرعەونی شێت
دەستی موسا ڕوییی تۆیە كوفری مەستیم چارەكە
یوسفی كەنعانی یەعقوبی دوو دیدە ڕۆشنی
ڕۆشنی كە ئەم دڵەم دەردی غەریبیم چارەكە
موعجیزەی خۆری كە دەگڕێ، دور لە یار تەنها و كەساس
تۆ لەتت كرد دڵ وەكو مانگ ڕەنگی زەردم چارەكە
هاتیە سەر ڕێگەم وتت ( انی انا الله ) ڕاپەریم
خەوبوو.گریام. دڵ غەرق بوو كەشتی ڕۆحم چارەكە
وەك خزر هێشتا مناڵ بوم، كوشتمت تا مردنم
زیندەگانیم پێ بدە دەردی نەبونم چارەكە
نابەڵەد ڕێگەم تەمە و بارم خەمە و بێزار و زار
دڵ جەمەو باڵات شەمە و ڕێگەی جنونم چارەكە
كێشی دەریات كردم و كردت بە دەریا دیدەكەم
سەد قەزای دیدەت گرم تاریكی دیدەم چارەكە
كێ دەزانێ خوایت وەیا بەندە بەڵام مەعلومە كێیت
تۆ (ئەو) ی دەستم بە دامان ئەو نەبوونم چارەكە.
| بۆچوونهکان |
|
Powered by !JoomlaComment 4.0alpha3